බියගම විලේජ්, හංවැල්ල විලේජ් සහ තවත් ව්‍යාපාර රැසක හිමිකරු වූ කෝටිපති ව්‍යාපාරික ආර්. ඊ. බී. ජයරත්න මහතාගේ ඝාතනය මුදල් කොන්ත්‍රාත්තුවක්‌ මත පළපුරුදු ඝාතකයකු විසින් සිදුකර ඇති බව පරීක්‍ෂණවලදී අනාවරණය වී ඇත.
ජයරත්න මහතාගේ ඝාතනය සිදුකර ඇති ආකාරය අනුව එය ඉතාම පළපුරුදු මිනීමරුවකු විසින් සිදුකරන්නට ඇති බවට පොලිසිය සැක පහළ කරයි.
ජයරත්න මහතාගේ ඝාතනය සිදුකර ඇති ආකාරය අනුව එය ඉතාම පළපුරුදු මිනීමරුවකු විසින් සිදුකරන්නට ඇති බවට පොලිසිය සැක පහළ කරයි.
එහෙත් ඝාතකයා ජයරත්න මහතාට බිම වැටෙන්නට පහර දී ඔහුගේ සිරුර මත නැග ඇඳ සිටි ජැකට්‌ටුව තුළ සඟවාගෙන තිබූ තියුණු පිහියකින් හිස දෙපලු වී යන ලෙස පහර දී ඇත. ජයරත්න මහතාගේ සිරුරේ අටපොළකට පහර දී ඇති ඝාතකයා පසුව ඒ අසලට පැමිණි තරුණියකට පිහිපහරක්‌ දී ලේ තැවරුණු පිහිය ද නැවත ජැකට්‌ටුව තුළ සඟවාගෙන පලාගොස්‌ තිබේ.
ඝාතකයා කිසිම කලබලයකින් තොරව මෙම ඝාතනය සිදුකර ඇති බවත් ජයරත්න මහතා මරා දැමීමට යොදාගත් පිහිය පවා ආපසු රැගෙන යැමත් සැලකිල්ලට ගැනීමේදී මොහු ඉතාම පළපුරුදු ඝාතකයකු බවත් පොලිසිය පවසයි.
ජයරත්න මහතා මරා දැමීමට පැමිණි පුද්ගලයා කිසිදු සාක්‍ෂියක්‌ පවා ඉතිරි කර ගොස්‌ නොමැති බව පරීක්‍ෂණවලදී හෙළිවී තිබේ.
මෙම ඝාතන සිද්ධිය සම්බන්ධයෙන් මේ වන විට බියගම විලේජ් හෝටලයේ සේවකයන් පිරිසකගෙන් ඇතුළු පුද්ගලයන් රැසකගෙන් පොලිසිය ප්‍රශ්න කර කටඋත්තර ලබාගෙන ඇත.
ඝාතනයට සම්බන්ධ සැකකරුවන් කිසිවකු ඊයේ (21 දා) වනතුරුත් අත්අඩංගුවට ගෙන නොතිබිණි.
ජයරත්න මහතා පුද්ගලයන් කීපදෙනකු සමඟ ආරවුල් ඇතිකරගෙන සිටි අතර ඒ පිළිබඳව සොයා බලාගෙන යන බව පොලිසිය පවසයි. මේ අතර මොහු කෝටි ගණනක්‌ මුදල් පොලියට ලබාදී ඇති බව ද පරික්‍ෂණවලින් අනාවරණය වී තිබේ.
ජයරත්න මහතාට රුපියල් බිලියන ගණනක දේපොළක්‌ හිමිව තිබූ අතර එම දේපොළ සම්බන්ධයෙන් පැවැති ආරවුලක්‌ මෙම ඝාතනයට හේතු වූයේ ද යන්න පිළිබඳව ද පොලිසිය සොයාබලාගෙන යයි.
ජයරත්න මහතා දොම්පේ ප්‍රදේශයේ පිහිටි ඔහුට අයත් පොල්වත්තට ගිය අවස්‌ථාවේ එහි කඩාවැදුණු සාහසිකයකු ඒ මහතා කපා කොටා කෲර අන්දමින් ඝාතනය කරනු ලැබුවේ පෙරේදා (20 වැනිදා) උදේ 6.30 ට පමණය.
සහකාර පොලිස්‌ අධිකාරි දේවප්‍රිය ජයසිංහ මහතාගේ අධීක්‍ෂණය යටතේ පොලිස්‌ කණ්‌ඩායමක්‌ මේ පිළිබඳව පරීක්‍ෂණ පවත්වාගෙන යන අතර පෑලියගොඩ අපරාධ කොට්‌ඨාසයේ ස්‌ථානාධිපති උපුල් සමරසිංහ මහතාගේ මෙහෙයවීමෙන් තවත් පොලිස්‌ කණ්‌ඩායමක්‌ පරීක්‍ෂණ පවත්වාගෙන යයි.
No comments:
Post a Comment